តើប្រើប្រាស់ zoom អាចប៉ះពាល់ដល់ឯកជនភាពអ្នកដែរឬទេ?
ការរីកសាយភាយនៃវីរុស COVID-19 បានធ្វើឲ្យក្រុមហ៊ុនសហគ្រាសនិងអង្គភាពជាច្រើនសម្រេចចិត្តឲ្យបុគ្គលិករបស់ពួកគេធ្វើការនៅផ្ទះក្នុងគោលបំណងដើម្បីទប់ស្កាត់ការរាតត្បាតនូវជំងឺនេះ និងធានាឲ្យបាននូវការបន្តដំណើរការការងាររបស់អង្គភាពរបស់ពួកគេ។ កម្មវិធី Zoom បានក្លាយជាកម្មវិធីមួយសម្រាប់ប្រើប្រាស់ក្នុងការទាក់ទងគ្នាពីបុគ្គលិកមួយទៅបុគ្គលិកមួយទៀតបើទោះបីពួកគេនៅកន្លែងផ្សេងគ្នាក៏ដោយ។ ប៉ុន្តែមុននឹងប្រើប្រាស់អ្នកទាំងអស់គ្នាគួរតែដឹងអំពីគោលនយោបាយមួយចំនួនរបស់កម្មវិធីនេះ។ ភាពងាយរងគ្រោះរបស់កម្មវិធី Zoom គឺការចែករំលែកទិន្នន័យរបស់អ្នកទៅកាន់បុគ្គលទី៣និងភាពងាយរងគ្រោះទៅលើផ្នែកសុវត្ថិភាពមួយចំនួន។
ការប្រមូលនិងចែកចាយទិន្នន័យរបស់អ្នក
កម្មវិធី Zoom តែងតែតាមដានអ្នកជានិច្ចរាល់ពេលអ្នកប្រើប្រាស់វា។ តាមរយះគោលនយោបាយឯកជនភាពរបស់ Zoom បានឲ្យដឹងថាពួកគេអាចទាញយកទិន្នន័យរបស់អ្នកដែលមានដូចជាឈ្មោះលេខផ្ទះ អាស័យដ្ឋានអ៊ីមែល លេខទូរស័ព្ទ មុខតំណែងការងារនិងព័ត៌មានពីទីកន្លែងធ្វើការរបស់អ្នក។បើទោះបីអ្នកមិនមានគណនី Zoom ក៏ដោយ ពួកគេមានលទ្ធភាពក្នុងការប្រមូលព័ត៌មានពីប្រភេទឧបករណ៏ដែលអ្នកប្រើប្រាស់និងទីតាំងដែលអ្នកកំពុងប្រើប្រាស់។ វាក៏មានលទ្ធភាពក្នុងការទាញយកព័ត៌មានពីគណនី ហ្វេសបុករបស់អ្នកផងដែរនៅពេលអ្នកយកគណនីហ្វេសបុករបស់អ្នកដើម្បីបង្កើតគណនី Zoom។ ក្នុងគោលនយោបាយរបស់ Zoom បើទោះបីជាមិនបានផ្តោតសំខាន់ក្នុងការលក់ទិន្នន័យរបស់អ្នកដើម្បីជាប្រភពចំណូលរបស់ពួកគេក៏ដោយក៏ប៉ុន្តែពួកគេបានចែករំលែកទិន្នន័យរបស់អ្នកទៅឲ្យក្រុមហ៊ុនទី៣ ដូចជា Google ជាដើម។
ការលួចចូលក្នុងកាម៉េរាកុំព្យូទ័ររបស់អ្នក
កាលពីឆ្នាំមុនអ្នកជំនាញបច្ចេកទេសលោក Johnathan Leitschuch បានរកឃើញថា Zoom បានតំឡើង Local Web Server មួយនៅលើកុំព្យូទ័រ Mac ដែលជាលទ្ធផលវាបានធ្វើឲ្យក្រុមHackerឆ្លៀតឱកាសក្នុងការចូលកាមេរ៉ារបស់អ្នកដោយមិនដឹងខ្លួន។ ជាលទ្ធផលអង្គភាពមួយឈ្មោះថា Electronic Privacy Information Center បានដាក់ពាក្យបណ្តឹងដល់ Zoom ក្នុងបញ្ហានេះ។ ក្រោយមក Zoom បានដកចេញនូវ Local WebServer មួយនេះដើម្បីបង្កើតនូវសុវត្ថិភាពដល់អ្នកប្រើប្រាស់នូវកម្មវិធីនេះ។
វីធីសាស្ត្រក្នុងការការពារទិន្នន័យរបស់អ្នក
នៅពេលដែល Zoom បានក្លាយជាផ្នែកមួយសំខាន់របស់ការងារអ្នកអ្នកគួរតែយល់ពីវិធីសាស្ត្រក្នុងការការពារសុវត្ថិភាពនិងឯកជនភាពរបស់អ្នក។ ទីមួយកុំប្រើប្រាស់ហ្វេសប៊ុកដើម្បីបង្កើតគណនី Zoom ពីព្រោះវាអាចធ្វើឲ្យអ្នកមិនសូវមានសុវត្ថិភាពនិងធ្វើឲ្យ Zoom មានលទ្ធភាពក្នុងការទាញយកទិន្នន័យមួយចំនួនពីគណនីហ្វេសប៊ុករបស់អ្នក។ ទី២ត្រូវធ្វើបច្ចុប្បន្នកម្មវិធី Zoom ជានិច្ចព្រោះវាអាចទប់ស្កាត់ពីមេរោគថ្មីៗដែលមាននៅលើកម្មវិធីZoom។ ពួកយើងទទួលស្គាល់ថាដើម្បីចូលរួមក្នុងការទប់ស្កាត់ពីការរាតត្បាតនៃ COVID-19 ការធ្វើការនៅផ្ទះគឺជាវិធីសាស្ត្រមួយក្នុងការទប់ស្កាត់។ ប៉ុន្តែយើងមិនគួរភ្លេចអំពីឯកជនភាព និងសុវត្ថិភាពរបស់អ្នកឡើយ។
ប្រភព
1. https://protonmail.com/blog/zoom-privacy-issues/
2. https://nypost.com/2020/03/19/zooms-coronavirus-boom-raises-privacy-concerns/
3. https://mashable.com/article/zoom-conference-call-work-from-home-privacy-concerns/
សម្រាប់អ្នកដែលចង់តាមដានព័ត៌មាននៅក្នុងស្មាតហ្វូន អាចធ្វើការទាញយក App នៅក្នុង AppStore &PlayStore ។
ចូលរួមទៅក្នុងបន្ទប់ផ្តល់ព័ត៌មាន Telegram channel សម្រាប់ទទួលបានព័ត៌មានចុងក្រោយស្តីពីសន្តិសុខអុិនធឺណិតទាំងក្នុង និងក្រៅប្រទេស៖ https://t.me/infosecisac។ ចង់ផ្សព្វផ្សាយពាណិជ្ជកម្ម សូមទំនាក់ទំនង info@secudemy.com
Subscribe to our Telegram channel for the latest updates on the Cybersecurity Breaking News in both locally and internationally: https://t.me/infosecisac.
For advertising: info@secudemy.com or Phone: +855 69 690 280
>> ព័ត៌មានខាងលើនេះត្រូវបានដកស្រង់ចេញពីក្នុងវេបសាយ DigitalHub101
