អត្ថបទទី ៤៩៖ ទំព័រ Facebook ធនាគារក្លែងក្លាយ (Fake Bank Pages)
រយៈពេលអាន៖ ២ នាទី
កម្រិតយល់ដឹង៖ មូលដ្ឋានគ្រឹះ
ឆាតទៅ Page ធនាគារក្លែងក្លាយ ហើយផ្ញើ OTP ឬលេខកាត? នោះអាចស្មើនឹងប្រគល់សោរគណនីឱ្យចោរ។
នៅអត្ថបទមុន យើងបាននិយាយពីល្បិច វេរលុយច្រឡំ (Fake Transfer Scam) ដែលជនខិលខូចប្រើសាច់រឿងអាណិត ដើម្បីបោកឱ្យអ្នកវេរលុយត្រឡប់ទៅវិញ។
អត្ថបទនេះ យើងនឹងបន្តមកស្គាល់ល្បិចមួយទៀត ដែលកើតឡើងញឹកញាប់នៅលើ Facebook នោះគឺ ទំព័រ Facebook ធនាគារក្លែងក្លាយ (Fake Bank Pages)។ ល្បិចនេះគ្រោះថ្នាក់ ព្រោះវាប្រើឈ្មោះ Logo និងរូបរាងរបស់ធនាគារពិត ដើម្បីធ្វើឱ្យអ្នកទុកចិត្ត ហើយឆាតទៅសួរព័ត៌មានដោយមិនបានពិនិត្យ។
និយាយឱ្យងាយយល់៖ ចោរបង្កើត Page ក្លែងក្លាយដូចធនាគារ ហើយធ្វើជាបុគ្គលិកបម្រើអតិថិជន ដើម្បីសុំលេខកុង លេខកាត PIN ឬ OTP ពីអ្នក។
១. ហានិភ័យ៖ Page ក្លែងក្លាយ បន្លំជាបុគ្គលិកធនាគារ
ជនខិលខូចដឹងថា មនុស្សជាច្រើនចូលចិត្តសួរព័ត៌មានតាម Facebook Messenger ពេលមានបញ្ហាគណនី ឬចង់ដឹងពីសេវាធនាគារ។ ដូច្នេះ ពួកគេអាចបង្កើត Page Facebook មួយដែលដាក់ឈ្មោះស្រដៀងធនាគារពិត ប្រើ Logo ដូចគ្នា និងបង្ហោះសារដូចជាទំព័រផ្លូវការ។
ពេលខ្លះ Page ក្លែងក្លាយអាច Boost Post ឱ្យលោតក្នុង News Feed ដើម្បីធ្វើឱ្យមើលទៅដូចជាការផ្សព្វផ្សាយផ្លូវការ។ ខ្លឹមសារដែលពួកគេប្រើអាចមានដូចជា៖
“ផ្តល់កម្ចីការប្រាក់ទាប អនុម័តរហ័ស”
“ជួយដោះស្រាយគណនីជាប់សោរ”
“អាប់ដេតគណនី VIP ឥតគិតថ្លៃ”
“Inbox មកដើម្បីផ្ទៀងផ្ទាត់គណនីរបស់អ្នក”
ពេលអ្នកឆាតទៅសួរព័ត៌មាន ពួកគេនឹងធ្វើជាបុគ្គលិកធនាគារ ហើយសុំព័ត៌មានសំខាន់ៗ ដូចជា លេខគណនី លេខកាត Visa ឬ Mastercard លេខ PIN លេខ OTP ឬ Screenshot ពីក្នុង App ធនាគារ។
ចំណុចគ្រោះថ្នាក់គឺ បើអ្នកផ្ញើព័ត៌មានទាំងនេះទៅឱ្យពួកគេ ជនខិលខូចអាចយកទៅចូលគណនី ធ្វើប្រតិបត្តិការ ឬកាត់ប្រាក់ពីគណនីរបស់អ្នកបាន។ សូមចាំថា OTP, PIN និងលេខកាតពេញលេញ គឺជាព័ត៌មានសម្ងាត់ មិនត្រូវផ្ញើតាម Chat ទៅអ្នកណាម្នាក់ឡើយ។
២. ដំណោះស្រាយ៖ ឆែក Page ផ្លូវការ និងកុំផ្ញើព័ត៌មានសម្ងាត់
មុនឆាតទៅ Page ធនាគារណាមួយ សូមពិនិត្យឱ្យច្បាស់ថា វាជាទំព័រផ្លូវការពិតប្រាកដ។ សូមមើលឈ្មោះ Page, ចំនួន Followers, ប្រវត្តិបង្ហោះ, Link ទៅ Website ផ្លូវការ និងសញ្ញាបញ្ជាក់ផ្លូវការ ដូចជា Blue Tick។
ប៉ុន្តែសូមកុំទុកចិត្តតែរូប Logo ឬឈ្មោះ Page ព្រោះចំណុចទាំងនេះអាចត្រូវបានចម្លងបាន។ បើអ្នកមានបញ្ហាគណនីធនាគារ វិធីដែលមានសុវត្ថិភាពជាងគេ គឺទាក់ទងទៅលេខ Call Center ផ្លូវការ ដែលមាននៅក្នុង App ធនាគារ Website ផ្លូវការ ឬខាងក្រោយកាត ATM របស់អ្នក។
សូមចាំថា បុគ្គលិកធនាគារពិត មិនសួរ PIN, Password ឬ OTP របស់អ្នកទេ។ ព័ត៌មានទាំងនេះគឺសម្រាប់តែម្ចាស់គណនីប្រើដោយខ្លួនឯងប៉ុណ្ណោះ។ បើមាន Page ណាសុំឱ្យផ្ញើលេខកូដ OTP ឬសុំឱ្យថតអេក្រង់ App ធនាគារផ្ញើទៅ នោះគឺជាសញ្ញាគ្រោះថ្នាក់។
ច្បាប់ងាយចាំ៖ ធនាគារពិតមិនសុំ OTP ឬ PIN តាម Chat ទេ។ បើមានគេសុំ សូមឈប់ឆាតភ្លាម។
សកម្មភាពប្រចាំអត្ថបទ
ថ្ងៃនេះ សូមហ្វឹកហាត់ទម្លាប់ Spot the Scam ដោយសាកល្បងប្រៀបធៀប Page ធនាគារពិត និង Page ធនាគារក្លែងក្លាយ។
សូមសង្កេតចំណុចសំខាន់ៗ ដូចជា សញ្ញា Blue Tick, ចំនួន Followers, ឈ្មោះ Page, ប្រវត្តិបង្ហោះ, Link ទៅ Website ផ្លូវការ និងរបៀបដែល Page នោះស្នើសុំព័ត៌មានពីអ្នក។
បើ Page ណាមួយសុំឱ្យអ្នកផ្ញើ OTP, PIN, Password, លេខកាតពេញលេញ ឬ Screenshot ពីក្នុង App ធនាគារ សូមកុំផ្ញើឱ្យសោះ។ សូមបិទ Chat ហើយទាក់ទងទៅធនាគារតាមលេខ Call Center ផ្លូវការដោយខ្លួនឯង។
