រយៈពេលអាន៖ ២ នាទី
កម្រិតយល់ដឹង៖ មធ្យម
ក្រាហ្វិកចំណេញលោតរាល់ថ្ងៃ មិនមានន័យថាអ្នកអាចដកលុយបានពិតទេ។ វាអាចជា Crypto ឬ Forex Scam។
នៅអត្ថបទមុន យើងបាននិយាយពី ការឆបោកតាមការទិញទំនិញអនឡាញ (Fake Online Shopping) ដែលជនខិលខូចប្រើតម្លៃថោក បង្ខំឱ្យវេរលុយមុន ហើយបន្ទាប់មកបាត់ស្រមោល។
អត្ថបទនេះ យើងនឹងបន្តមកស្គាល់ល្បិចមួយទៀត ដែលទាក់ទាញមនុស្សតាមរយៈពាក្យថា ចំណេញលឿន ចំណេញខ្ពស់ និងគ្មានហានិភ័យ។ ល្បិចនេះគេហៅថា ការឆបោកការវិនិយោគលើ Crypto ឬ Forex (Crypto/Forex Scams)។
និយាយឱ្យងាយយល់៖ ចោរបង្កើត App ឬ Website វិនិយោគក្លែងក្លាយ បង្ហាញក្រាហ្វិកចំណេញឱ្យអ្នករំភើប ប៉ុន្តែពេលចង់ដកលុយ ពួកគេនឹងទាមទារឱ្យបង់ប្រាក់បន្ថែមរហូត។
១. ហានិភ័យ៖ Website វិនិយោគខ្មោច និងចំណេញក្លែងក្លាយ
ជនខិលខូចច្រើនចាប់ផ្តើមពីការឆាតតាម Telegram, Facebook, WhatsApp ឬតាមរយៈមនុស្សដែលអ្នកស្គាល់។ ពួកគេអាចបង្ហាញខ្លួនជាអ្នកជំនាញវិនិយោគ Broker, គ្រូបង្រៀន Trading ឬអ្នកដែលបានចំណេញច្រើនពី Crypto និង Forex។
ពួកគេច្រើនប្រើសារទាក់ទាញដូចជា៖
“ដាក់តែ ១០០ ដុល្លារ អាចចំណេញ ៣០០ ដុល្លារក្នុងមួយសប្តាហ៍”
“មាន AI ជួយ Trade ឱ្យ ដោយគ្មានហានិភ័យ”
“ចំណេញ ២០% ទៅ ៥០% រាល់សប្តាហ៍”
“ឱកាសនេះមានកំណត់ ត្រូវចុះឈ្មោះថ្ងៃនេះ”
បន្ទាប់មក ពួកគេនឹងផ្ញើ Link ឱ្យអ្នកចុះឈ្មោះក្នុង App ឬ Website មួយ។ ពេលអ្នកដាក់លុយដំបូង វេបសាយនោះអាចបង្ហាញតួលេខចំណេញ ក្រាហ្វិកឡើងខ្ពស់ និង Balance កើនឡើងរាល់ថ្ងៃ។ ទាំងអស់នេះអាចត្រូវបានរៀបចំឡើង ដើម្បីធ្វើឱ្យអ្នកជឿថាកំពុងចំណេញពិត។
ពេលអ្នកឃើញលុយកើនឡើង អ្នកអាចចាប់ផ្តើមចង់ដាក់លុយបន្ថែម។ ខ្លះអាចខ្ចីលុយគេ លក់របស់ ឬយកប្រាក់សន្សំមកដាក់ ព្រោះគិតថា “បើដាក់ច្រើន ចំណេញកាន់តែច្រើន”។
បញ្ហាពិតចាប់ផ្តើមនៅពេលអ្នកចង់ដកប្រាក់។ ពួកគេអាចប្រាប់ថា អ្នកត្រូវបង់ពន្ធ បង់ថ្លៃសេវាដកប្រាក់ បង់ថ្លៃបញ្ជាក់គណនី ឬបង់ប្រាក់កក់បន្ថែមសិន ទើបអាចដកលុយបាន។
ទោះអ្នកបង់បន្ថែមប៉ុន្មានដងក៏ដោយ ពួកគេអាចបន្តរកលេសថ្មីៗ ហើយចុងក្រោយ Block អ្នក បិទ Website ឬលុបគណនីចោល។ តួលេខចំណេញដែលអ្នកឃើញលើអេក្រង់ គឺគ្រាន់តែជាលេខក្លែងក្លាយ មិនមែនជាប្រាក់ដែលអ្នកអាចដកបានពិតប្រាកដឡើយ។
២. ដំណោះស្រាយ៖ ការវិនិយោគពិត តែងមានហានិភ័យ
សូមចាំថា ការវិនិយោគពិត មិនមានការធានាចំណេញ ១០០% ទេ។ ទីផ្សារ Crypto និង Forex មានការប្រែប្រួលខ្លាំង ហើយអាចចំណេញ ក៏អាចខាតបានដែរ។ បើមាននរណាម្នាក់ធានាថា ចំណេញខ្ពស់រាល់ថ្ងៃ ដោយគ្មានហានិភ័យ នោះគឺជាសញ្ញាគ្រោះថ្នាក់។
មុនវិនិយោគ សូមពិនិត្យប្រភពឱ្យច្បាស់។ តើក្រុមហ៊ុន ឬ Platform នោះមានអាជ្ញាប័ណ្ណត្រឹមត្រូវដែរឬទេ? តើមានទីតាំងពិតប្រាកដឬអត់? តើមានការទទួលស្គាល់ពីស្ថាប័នផ្លូវការដែរឬទេ? កុំជឿតែវិញ្ញាបនបត្រ Screenshot ឬឯកសារដែលគេផ្ញើតាម Telegram ព្រោះវាអាចក្លែងក្លាយបាន។
សូមកុំវិនិយោគលើអ្វីដែលអ្នកមិនយល់។ ប្រសិនបើអ្នកមិនយល់ថា Crypto, Forex, Trading, Leverage ឬ Risk ដំណើរការយ៉ាងដូចម្តេច សូមកុំប្រគល់លុយឱ្យអ្នកទីបីវិនិយោគជំនួសអ្នក។
បើអ្នកបានដាក់លុយទៅហើយ ហើយពេលដកប្រាក់គេទាមទារឱ្យបង់ថ្លៃបន្ថែម សូមកុំបង់បន្ត។ ការបង់បន្ថែមមិនធានាថាអ្នកនឹងដកលុយបានទេ ហើយភាគច្រើនវាគ្រាន់តែជាជំហានបោកយកលុយបន្ថែមប៉ុណ្ណោះ។
ច្បាប់ងាយចាំ៖ ចំណេញខ្ពស់ គ្មានហានិភ័យ និងដកលុយត្រូវបង់ថ្លៃមុន គឺជាសញ្ញាធំបំផុតនៃ Investment Scam។
សកម្មភាពប្រចាំអត្ថបទ
ថ្ងៃនេះ សូមហ្វឹកហាត់ទម្លាប់ Spot the Scam ពេលឃើញសារ ឬការផ្សព្វផ្សាយអំពី Crypto, Forex ឬ App វិនិយោគណាមួយ។
សូមសង្កេតចំណុចសំខាន់ៗដូចជា៖ តើគេធានាចំណេញខ្ពស់ពេកឬអត់? តើគេនិយាយថាគ្មានហានិភ័យដែរឬទេ? តើគេបង្ខំឱ្យចុះឈ្មោះ ឬដាក់លុយបន្ទាន់ដែរឬទេ? តើ Website ឬ App នោះមានប្រភពច្បាស់លាស់ឬអត់? តើពេលដកលុយ គេទាមទារឱ្យបង់ថ្លៃបន្ថែមមុនដែរឬទេ?
បើមានចំណុចគួរឱ្យសង្ស័យ សូមកុំដាក់លុយ។ បើអ្នកបានរងគ្រោះរួចហើយ សូមរក្សាទុកភស្តុតាង ដូចជា Screenshot Chat, Link Website, លេខគណនី, ប្រវត្តិវេរលុយ និងឈ្មោះគណនីដែលពាក់ព័ន្ធ ដើម្បីប្រើសម្រាប់រាយការណ៍។