ក្នុងពិភពឌីជីថលដែលមានការតភ្ជាប់គ្នានាពេលបច្ចុប្បន្ន សន្តិសុខអុីនធឺណិតបានក្លាយជាកង្វល់ដ៏សំខាន់សម្រាប់អង្គភាពគ្រប់ប្រភេទ និងគ្រប់ទំហំ។ ស្ថានភាពសន្តិសុខអុីនធឺណិតកំពុងវិវត្តជាប់ជានិច្ច ដោយមានការគំរាមកំហែងថ្មីៗកើតឡើងជារៀងរាល់ថ្ងៃ ខណៈពេលដែលឧក្រិដ្ឋជនតាមអុីនធឺណិតបង្កើតវិធីវាយប្រហារដែលកាន់តែស្មុគស្មាញ និងកេងចំណេញពីភាពងាយរងគ្រោះ (vulnerability) ក្នុងហេដ្ឋារចនាសម្ព័ន្ធឌីជីថលរបស់យើង។
រាប់ចាប់ពីអាជីវកម្មខ្នាតតូចរហូតដល់ក្រុមហ៊ុនពហុជាតិ ចាប់ពីស្ថាប័នរាជរដ្ឋាភិបាលរហូតដល់ប្រព័ន្ធថែទាំសុខភាព គ្មានអង្គភាពណាមួយមានភាពស៊ាំទៅនឹងការគំរាមកំហែងសាយប័រដែលកំពុងកើនឡើងជារៀងរាល់ថ្ងៃនោះទេ។ ការផ្លាស់ប្តូរឌីជីថលយ៉ាងឆាប់រហ័សបានពង្រីកមធ្យោបាយសម្រាប់ប្រើប្រាស់ដើម្បីធ្វើការវាយប្រហារ ដោយបង្កើតភាពងាយរងគ្រោះថ្មីៗ ខណៈពេលដែលយើងកំពុងបង្កើនការពឹងផ្អែកលើប្រព័ន្ធឌីជីថលសម្រាប់ប្រតិបត្តិការសំខាន់ៗនាយុគ្គសម័យនេះ។
១. ការគំរាមកំហែងតាមអុីនធឺណិតដែលកំពុងវិវត្តន៍
ការគំរាមកំហែងថ្មីៗកើតឡើងជារៀងរាល់ថ្ងៃដែលអាចធ្វើឱ្យប៉ះពាល់ដល់ទិន្នន័យរសើប រំខានដល់ប្រតិបត្តិការ និងបង្កការខូចខាតដល់កិត្តិនាម។ អង្គភាពគ្រប់ទំហំប្រឈមមុខនឹងការវាយប្រហារដ៏ស្មុគស្មាញពីឧក្រិដ្ឋជនតាមអុីនធឺណិត។
២. ផលប៉ះពាល់ហិរញ្ញវត្ថុដ៏ធ្ងន់ធ្ងរ
ថ្លៃដើមជាមធ្យមនៃការលេចធ្លាយទិន្នន័យឡើងដល់រាប់លានដុល្លារ។ លើសពីការខាតបង់ផ្នែកហិរញ្ញវត្ថុ អង្គភាពអាចប្រឈមមុខនឹងការពិន័យតាមបទប្បញ្ញត្តិ ការទទួលខុសត្រូវផ្លូវច្បាប់ និងការខូចខាតកិត្តិនាមរយៈពេលវែង ដែលធ្វើឱ្យប៉ះពាល់ដល់ទំនុកចិត្តរបស់អតិថិជន។
៣. សុវត្ថិភាពសាធារណៈ និងសន្តិសុខជាតិ
ខណៈពេលដែលហេដ្ឋារចនាសម្ព័ន្ធព័ត៌មានសំខាន់ៗកាន់តែមានការតភ្ជាប់គ្នា សន្តិសុខអុីនធឺណិតក្លាយជាបញ្ហានៃសុវត្ថិភាពសាធារណៈ។ ចាប់ពីបណ្តាញថាមពលរហូតដល់ប្រព័ន្ធថែទាំសុខភាព ការការពារទ្រព្យសកម្មឌីជីថលមានន័យថាការការពារជីវិតមនុស្ស និងស្ថិរភាពសង្គម។
៤. ចាំបាច់សម្រាប់ការរស់រានរបស់អង្គភាព
សន្តិសុខអុីនធឺណិតលែងជាជម្រើសទៀតហើយ ប៉ុន្តែវាជាកត្តាចាំបាច់សម្រាប់ការរស់រាននៃអង្គភាព។ ការវិនិយោគក្នុងសន្តិសុខអុីនធឺណិតធានាបាននូវនិរន្តរន៍ភាពអាជីវកម្ម រក្សាបាននូវអត្ថប្រយោជន៍ប្រកួតប្រជែង និងបំពេញកាតព្វកិច្ចសីលធម៌ចំពោះអតិថិជន និងបុគ្គលិក។
ស្ថានភាពនៃការគំរាមកំហែងបច្ចុប្បន្នត្រូវបានចាត់ទុកជានិន្នាការមួយគួរឱ្យព្រួយបារម្ភ ដែលទាមទារការយកចិត្តទុកដាក់។ ការវាយប្រហារដោយ ransomware បានឈានដល់កម្រិតរាតត្បាត ដោយឧក្រិដ្ឋជនតាមអុីនធឺណិតកំណត់គោលដៅលើអ្វីៗទាំងអស់ រាប់ចាប់ពីកុំព្យូទ័រឯកជនរហូតដល់ហេដ្ឋារចនាសម្ព័ន្ធព័ត៌មានសំខាន់ៗ (CIIs) នៃទីក្រុងទាំងមូល។ ការគំរាមកំហែងដែលមានលក្ខណៈអចិន្ត្រៃយ៍កម្រិតខ្ពស់ (APTs) ដែលឧបត្ថម្ភដោយរដ្ឋ កំពុងធ្វើយុទ្ធនាការចារកម្មរយៈពេលវែង ខណៈពេលដែលការគំរាមកំហែងពីខាងក្នុង បង្កហានិភ័យកម្រិតខ្ពស់ពីក្នុងអង្គភាពខ្លួនឯង។ ការវាយប្រហារវិស្វកម្មសង្គមបន្តកេងចំណេញពីចិត្តសាស្ត្រមនុស្ស ដោយធ្វើឱ្យបុគ្គលិកក្លាយជាចំណុចខ្សោយបំផុតនៃការការពារសន្តិសុខអុីនធឺណិត។
លើសពីនេះទៅទៀត ការកើនឡើងនៃបញ្ញាសិប្បនិម្មិត និង machine learning (ML) បានបង្កើតជាដាវមុខពីរ ក្នុងបរិបទសន្តិសុខអុីនធឺណិត។ ខណៈពេលដែលបច្ចេកវិទ្យាទាំងនេះផ្តល់ជាកម្មវិធីដ៏មានអានុភាពសម្រាប់ការរកឃើញការគំរាមកំហែង និងការឆ្លើយតប វាក៏អាចឱ្យឧក្រិដ្ឋជនតាមអុីនធឺណិតស្វ័យប្រវត្តិកម្មការវាយប្រហារ និងអភិវឌ្ឍន៍វិធីសាស្ត្រគេចវេសកាន់តែស្មុគស្មាញ។ អុីនធឺណិតនៃវត្ថុ (IoT) បានបង្កើនចំនួនឧបករណ៍ដែលតភ្ជាប់គ្នាយ៉ាងច្រើន ដោយឧបករណ៍នីមួយៗតំណាងឱ្យចំណុចចូល ដែលអាចមានសម្រាប់អ្នកវាយប្រហារដែលព្យាយាមចូលទៅក្នុងបណ្តាញ ឬប្រព័ន្ធឌីជីថលរបស់អ្នក។
ការយល់ដឹងអំពីស្ថានភាពស្មុគស្មាញនេះ គឺជាជំហានដំបូងក្នុងការបង្កើតយុទ្ធសាស្ត្រសន្តិសុខអុីនធឺណិតដែលមានប្រសិទ្ធភាព។ អង្គភាពត្រូវតែទទួលស្គាល់ថា សន្តិសុខអុីនធឺណិតមិនមែនគ្រាន់តែជាបញ្ហាបច្ចេកទេសប៉ុណ្ណោះទេ ប៉ុន្តែជាបញ្ហាគ្រប់គ្រងហានិភ័យដ៏ទូលំទូលាយដែលតម្រូវឱ្យមានភាពជាអ្នកដឹកនាំប្រតិបត្តិ ការយល់ដឹងរបស់បុគ្គលិក គោលនយោបាយរឹងមាំ និងការសម្របខ្លួនជាប់ជានិច្ចទៅនឹងការគំរាមកំហែងដែលកើតឡើងថ្មីៗ។
