ក្រុមហ៊ុនអាកាសចរណ៍ Japan Airlines រងការបែកធ្លាយទិន្នន័យអ្នកដំណើរជាង ៩២,០០០ នាក់ ខណៈរដ្ឋាភិបាលជប៉ុនប្រកាសដាក់ចេញវិធានការសង្គ្រោះបន្ទាន់

រលកយក្សនៃការវាយប្រហារសាយប័រលើប្រទេសជប៉ុននៅតែបន្តវាយលុកឥតឈប់ឈរ! ក្រុមហ៊ុនអាកាសចរណ៍ជាតិ Japan Airlines (JAL) បានចេញសេចក្តីជូនដំណឹងជាផ្លូវការអំពីឧប្បត្តិហេតុបែកធ្លាយទិន្នន័យ (Data Breach) ដ៏ធំមួយ បន្ទាប់ពីក្រុមហ៊ុនផ្គត់ផ្គង់សេវា IT ភាគីទីបីរបស់ខ្លួនត្រូវបានហេគឃ័រទម្លុះប្រព័ន្ធ ដែលបណ្តាលឱ្យទិន្នន័យផ្ទាល់ខ្លួនរបស់អតិថិជនជាង ៩២,០០០ នាក់ ត្រូវបានបែកធ្លាយចេញក្រៅ។

ហេតុការណ៍នេះបានកើតឡើងតាមរយៈក្រុមហ៊ុន Amadeus IT Group ដែលជាប្រតិបត្តិករគ្រប់គ្រងប្រព័ន្ធកក់សំបុត្រយន្តហោះ ចេញសំបុត្រ និងប្រព័ន្ធ Check-in។ Amadeus បានជូនដំណឹងមក JAL ថា ហេគឃ័របានលួចចូលទៅកាន់ «ចំណែកនៃទិន្នន័យកក់សំបុត្ររបស់អតិថិជន» សម្រាប់ជើងហោះហើររបស់ Japan Airlines និង Japan Transocean Air។ ក្នុងចំណោមអ្នកដំណើរដែលរងផលប៉ះពាល់សរុប ៩២,០០០ នាក់ ហេគឃ័របានលួចយក ឈ្មោះ លេខកូដកក់សំបុត្រ (Reservation Codes) និងព័ត៌មានលម្អិតនៃជើងហោះហើរ។ អ្វីដែលកាន់តែគ្រោះថ្នាក់នោះគឺ សម្រាប់អតិថិជនប្រមាណ ២,០០០ នាក់ ហេគឃ័របានលួចបានទាំង លេខលិខិតឆ្លងដែន (Passport Numbers), លេខសមាជិក Frequent Flyer, អាសយដ្ឋានអ៊ីមែល និងលេខទូរស័ព្ទ។ ទោះជាយ៉ាងណា JAL បានបញ្ជាក់ថា ប្រតិបត្តិការហោះហើរមិនរងផលប៉ះពាល់ឡើយ ហើយព័ត៌មានកាតឥណទានក៏ពុំត្រូវបានបែកធ្លាយនោះដែរ។

ឧប្បត្តិហេតុលើ Japan Airlines គឺជាដំណក់ទឹកចុងក្រោយដែលធ្វើឱ្យកក្រើកទូទាំងប្រទេសជប៉ុន ស្របពេលដែលក្រុមហ៊ុនធំៗជាបន្តបន្ទាប់ទើបតែរងគ្រោះក្នុងរយៈពេលពីរសប្តាហ៍ចុងក្រោយនេះ រួមមាន៖ ក្រុមហ៊ុន ISP របស់ Sony Network Communications ធ្លាយទិន្នន័យជាង ២.៥ លាននាក់, Burger King Japan ធ្លាយទិន្នន័យសមាជិកជាង ១១ លាននាក់, ក្រុមហ៊ុនហ្គេមយក្ស Capcom ប៉ះពាល់មនុស្ស ១១.៧ លាននាក់, និងក្រុមហ៊ុនសេវាហិរញ្ញវត្ថុអនឡាញធំមួយត្រូវចេញថ្លៃសងជំងឺចិត្តដល់អតិថិជន ក្រោយប្រព័ន្ធជួញដូររូបិយប័ណ្ណបរទេស (Forex) ត្រូវរងការវាយប្រហារបណ្តាលឱ្យខាតបង់ប្រាក់កាស។

ទំហំនៃការវាយប្រហារដ៏សន្ធឹកសន្ធាប់នេះ បានបង្ខំឱ្យនាយករដ្ឋមន្ត្រីជប៉ុន លោកស្រី Sanae Takaichi កោះប្រជុំគណៈរដ្ឋមន្ត្រីជាបន្ទាន់កាលពីថ្ងៃចន្ទ ដោយបានប្តេជ្ញាដាក់ចេញនូវ កញ្ចប់វិធានការសង្គ្រោះបន្ទាន់ (Package of Emergency Measures) ដើម្បីការពារពលរដ្ឋ និងក្រុមហ៊ុនជប៉ុនពីការវាយប្រហារសាយប័រ។ លោកស្រីបានថ្លែងថា៖ «ស្ថានភាពនេះគឺធ្ងន់ធ្ងរខ្លាំងណាស់ ជាមួយនឹងការព្រួយបារម្ភកាន់តែខ្លាំងឡើងអំពីការខូចខាតដល់ប្រជាពលរដ្ឋដែលបណ្តាលមកពីការយកទិន្នន័យបែកធ្លាយទៅប្រើប្រាស់ខុសច្បាប់។ យើងត្រូវតែពង្រឹងវិធានការឆ្លើយតបជាបន្ទាន់!»។ ជាមួយគ្នានេះ រដ្ឋមន្ត្រីក្រសួងការពារជាតិជប៉ុន លោក Shinjiro Koizumi ក៏បានជួបពិភាក្សាជាមួយរដ្ឋមន្ត្រីការពារជាតិអាមេរិក លោក Pete Hegseth នៅប្រទេសហ្វីលីពីន ដើម្បីពង្រឹងកិច្ចសហការទប់ស្កាត់ការគំរាមកំហែងសាយប័រទ្រង់ទ្រាយធំនេះផងដែរ។

មេរៀនសន្តិសុខសាយប័រ និងអនុសាសន៍បន្ទាន់ពី SecuDemy

• គ្រោះថ្នាក់ដែលកើតចេញពីភាគីទីបី (Third-Party / Supply Chain Risk)៖ ករណី JAL បញ្ជាក់យ៉ាងច្បាស់ថា ទោះបីជាក្រុមហ៊ុនផ្ទាល់មានប្រព័ន្ធការពាររឹងមាំយ៉ាងណាក៏ដោយ ក៏នៅតែអាចរងគ្រោះតាមរយៈដៃគូផ្គត់ផ្គង់សេវាកម្ម (IT Vendors ដូចជា Amadeus)។ ស្ថាប័ននានាត្រូវតែធ្វើសវនកម្មសន្តិសុខ (Security Audit) និងរឹតបន្តឹងកិច្ចសន្យាការពារទិន្នន័យជាមួយ Vendor ទាំងអស់ជាប្រចាំ។
• ប្រយ័ត្នចំពោះល្បិចបោកបញ្ឆោតបន្ទាប់ពីទិន្នន័យបែកធ្លាយ (Targeted Phishing)៖ សម្រាប់អ្នកដំណើរ ឬអតិថិជនដែលរងផលប៉ះពាល់ ត្រូវប្រុងប្រយ័ត្នខ្ពស់ចំពោះអ៊ីមែល សារ SMS ឬការខលទូរស័ព្ទណាដែលបន្លំជាក្រុមហ៊ុនអាកាសចរណ៍ JAL ដោយលើកឡើងពីបញ្ហាសំបុត្រយន្តហោះ ឬជើងហោះហើរ ដើម្បីបញ្ឆោតយកលេខកាតធនាគារ ឬ Password។
• ការការពារទិន្នន័យអត្តសញ្ញាណជាតិ និងលិខិតឆ្លងដែន៖ ស្ថាប័នដែលប្រមូលទិន្នន័យលិខិតឆ្លងដែន និងអត្តសញ្ញាណប័ណ្ណ ត្រូវតែបែងចែកការរក្សាទុកដាច់ដោយឡែក (Isolation) និងប្រើប្រាស់ការធ្វើកូដនីយកម្មកម្រិតខ្ពស់ (Strong Encryption at Rest) ដើម្បីកុំឱ្យហេគឃ័រទាញយកបានដោយងាយស្រួលនៅពេលទម្លុះចូលប្រព័ន្ធ។

ប្រភពដើម៖ The Record Media / Japan Times

អត្ថបទនេះផ្តល់ជូនដោយ Bitdefender Total Security

Bitdefender Total Security គឺជាកញ្ចប់កម្មវិធីការពារឧបករណ៍របស់អ្នកដែលអាចតំឡើងនៅលើប្រព័ន្ធប្រតិបត្តិការ (Windows, macOS, iOS, Android) ដែលប្រមូលផ្តុំនូវមុខងារជាច្រើន មានដូចជា មុខការទប់ស្កាត់និងកម្ចាត់មេរោគ មុខងារឯកជនភាព និងមុខងារសុវត្ថិភាពសំខាន់ៗផ្សេងទៀត ទៅក្នុងកញ្ចប់កម្មវិធីតែមួយ។ Bitdefender អាចបញ្ឈប់មេរោគកុំព្យូទ័រមិនឱ្យឆ្លង ទប់ស្កាត់មោរោគចាប់ជំរិតទារប្រាក់ (ransomware) ការវាយប្រហារតាមភាពងាយរងគ្រោះ/ចន្លោះប្រហោងទើបប្រទះឃើញ (zero-day exploits) និងមេរោគស៊ើបការណ៍ (spyware) មុនពេលដែលវាបង្កការខូចខាតដល់កុំព្យូទ័រ/ប្រព័ន្ធរបស់យើង។ លើសពីនេះ វាក៏មានការការពារនៅកម្រិតបណ្តាញ ដើម្បីរារាំងគេហទំព័រឆបោក (phishing) និងតំណភ្ជាប់ដែលមានមេរោគផងដែរ៕