ការរកឃើញនៃការវាយប្រហារទៅលើ iOS ដោយ Google គួរតែជាការដាក់តឿនភ្ញាក់រលឹកមួយសម្រាប់អ្នកប្រើប្រាស់ iPhone
ប្រសិនបើអ្នក ជាអ្នកប្រើប្រាស់ iPhone ដែលមានប្រព័ន្ធប្រតិបត្តិការ iOS អ្នកក៏អាចប្រឈមមុខទៅនឹងភាពប្រថុយនឹងគ្រោះថ្នាក់ដែលអ្នកអាចក្លាយទៅជាជនរងគ្រោះពីការវាយប្រហាររបស់ចោរបច្ចេកវិទ្យា នេះបើយោងតាមការស្រាវជ្រាវដោយក្រុមវិភាគការគំរាមកំហែងរបស់ក្រុមហ៊ុន Google (TAG) ។
TAG បានរកឃើញវេបសាយដែលត្រូវបានគេលួចចូល (hacked) មួយចំនួនតូចបាននឹងកំពុងត្រូវបានគេប្រើប្រាស់ ដើម្បីវាយលុកទៅលើចំនុចខ្សោយ (vulnerability) នៅក្នុង iOS ដល់ទៅ៥ ដើម្បីគ្រប់គ្រងទៅលើទូរស័ព្ទ iPhone ដែលយ៉ាងហោចណាស់ ១ក្នុងចំណោមចំនុចខ្សោយទាំង ៥ នោះគឺជាចំនុចខ្សោយដែលគេមិនបានស្គាល់សោះឡើយ ឬហៅថា Zero-day vulnerability។
ចោរបច្ចេកវិទ្យាបានប្រើប្រាស់បច្ចេកទេស “water hole attack” ដោយការបញ្ចូលមេរោគទៅក្នុងវេបសាយដែលក្រុមអ្នកប្រើប្រាស់ជាក់លាក់ (ក្នុងករណីនេះអ្នកប្រើប្រាស់ប្រព័ន្ធប្រតិបត្តិការ iOS) ចូលចិត្តបើកមើល។ ជាជាងប្រើប្រាស់វេបសាបង្កើតឡើងដើម្បីបំភាន់ជនរងគ្រោះ ចោរបច្ចេកវិទ្យាធ្វើការវាយលុកទៅលើវេបសាយស្របច្បាប់ ហើយដែលពេញនិយម។
ក្រុមអ្នកស្រាវជ្រាវជឿជាក់ថា វេបសាយដំបូងដែលរងគ្រោះដោយការវាយប្រហារ បានចាប់ផ្តើមចែកចាយមេរោគក្នុងឆ្នាំ២០១៦ ដោយចាប់ផ្តើមវាយលុកទៅលើប្រព័ន្ធប្រតិបត្តិការ iOS 10។ ខ្សែសង្វាក់នៃការវាយលុកចុងក្រោយបង្អស់ផ្តោតលើប្រព័ន្ធប្រតិបត្តិការចុងក្រោយរបស់ Apple គឺ iOS 12។ ក៏ប៉ុន្តែបញ្ហានេះត្រូវជួសជុលដោយក្រុមហ៊ុន Apple រួចរាល់ហើយដែរ។
ក្រុមអ្នកស្រាវជ្រាវប៉ាន់ប្រមាណថា មានអ្នកទស្សនារាប់ពាន់នាក់បានចូលទៅកាន់គេហទំព័រដែលត្រូវបានរកឃើញជារៀងរាល់សប្តាហ៍ ហើយចោរបច្ចេកវិទ្យាមិនតម្រូវឱ្យអ្នកប្រើប្រាស់ទាញយកឯកសារអ្វីឡើយដើម្បីវាយប្រហារ។ ប្រសិនបើការវាយប្រហារជោគជ័យ មេរោគត្រូវបានតំឡើងនៅក្នុងទូរស័ព្ទ។ មេរោគវានឹងតំឡើងខ្លួនវានៅក្នុង /tmp folder ក៏ប៉ុន្តែមិនមានលទ្ធភាពក្នុងការស្ថិតនៅជាអចិន្ត្រៃយ៍ឡើយនៅក្នុងឧបករណ៍នោះ។ មានន័យថា នៅពេលដែលយើងធ្វើការ rebooting device នោះវានឹងបាត់ទៅវិញ។
ទោះបីជាយ៉ាងណាក៏ដោយ មុនពេលដែលមានការ reboot កើតឡើង មេរោគនឹងធ្វើការទំនាក់ទំនងជាមួយនឹងម៉ាស៊ីនមេបញ្ជា (command-and-control server) រៀងរាល់ ៦០វិនាទីម្តង ដែលនឹងផ្តល់នូវការបញ្ជាថាតើព័ត៌មានអ្វីដែលគួរតែលួចពីឧបករណ៍នោះ។
អ្នកវាយប្រហារអាចលួចយក រូបរូបថត ទិន្នន័យអីុម៉ែល (email data) បញ្ជីទំនាក់ទំនង (contact list) និងទិន្នន័យទីតាំង GPS ពីឧបករណ៍។ ដូចគ្នានេះដែរវាក៏អាចចូលមើលឯកសារទិន្នន័យនៃកម្មវិធីផ្ញើសារដែលបានកូដនីយកម្ម (encrypt) ដូចជា Whatsapp និង Telegram ដែលអនុញ្ញាតឱ្យអ្នកវាយប្រហារមើលឃើញសារជាអត្ថបទធម្មតា (plain-text)។
បើតាមអ្វីដែលបានកើតឡើងមកនេះ បានបង្ហាញឱ្យយើងឃើញថា ប្រព័ន្ធប្រតិបត្តិការ iOS ក៏មានចំនុចខ្សោយដែលអាចឱ្យមានការវាយប្រហារបានដែរ រួមទាំងកម្មវិធី (applications) របស់វាផងដែរ។ អស់រយៈពេលជាយូរមកហើយ ដែលមានការយល់ខុសថា iOS និង OSX គឺជាប្រព័ន្ធប្រតិបត្តិការមួយ ដែលមិនចាំបាច់ត្រូវការនូវប្រព័ន្ធសន្តិសុខ ដូចជាកម្មវិធីកំចាត់មេរោគក្នុងការការពារនោះឡើយ។
យោងទៅតាមការស្រាវជ្រាវរបស់ Statista បានឱ្យដឹងថា ៧៣ភាគរយនៃការវាយប្រហារដោយមេរោគគឺទៅលើ Windows, ៥,៦ភាគរយគឺទៅលើ Google’s Android និងប្រព័ន្ធប្រតិបត្តិការផ្សេងៗទៀតមានចំនួន ២០,៦ ភាគរយ។ ក៏ប៉ុន្តែដោយសារតែកេរ្តិ៍ឈ្មោះរបស់ Apple ក្នុងការអភិវឌ្ឍនូវផលិតផលដែលមានសុវត្ថិភាព (secure products) ដែលជាហេតុធ្វើឱ្យ Apple ក្លាយជាគោលដៅរបស់ក្រុមឧក្រិដ្ឋជនដើម្បីធ្វើការរកភាពល្បីល្បាញពេលដែលអាចវាយលុកបានជោគជ័យផងដែរ។
ជាចុងក្រោយបញ្ហានេះគឺបានបញ្ជាក់ពីភាពសំខាន់ចាំបាច់ក្នុងការអាប់ដេតនូវឧបករណ៍របស់អ្នក ទៅកាន់កំណែចុងក្រោយបង្អស់។ ឧក្រិដ្ឋជនមិនឈប់នោះទេក្នុងការស្វែងរកនូវវិធីសាស្ត្រវាយលុក ទៅក្នុងប្រព័ន្ធប្រតិបត្តិការស្មាតហ្វូន៕
