តាមប្រភពព័ត៌មានពី CNN លោកប្រធានាធិបតីត្រាំ បានមានប្រសាសន៍កាលពីថ្ងៃសុក្រកន្លងទៅនេះថា គាត់នឹងធ្វើការហាមឃាត់ កម្មវិធីស្មាតហ្វូនដែលកំពុងពេញនិយម TikTok មិនឱ្យដំណើរការនៅក្នុងទឹកដីសហរដ្ឋអាមេរិកឡើយ ដែលជាការច្រានចោលកិច្ចព្រមព្រៀងដ៏មានសក្តានុពលសម្រាប់ក្រុមហ៊ុន Microsoft ដើម្បីទិញកម្មវិធីនេះពីក្រុមហ៊ុនមេដែលគ្រប់គ្រងដោយជនជាតិចិន។
លោក Trump បាននិយាយប្រាប់ក្រុមអ្នកសារព័ត៌មាននៅពេលធ្វើដំណើរលើយន្តហោះ Air Force One ថា “ដោយសារតែមានការព្រួយបារម្ភទៅលើកម្មវិធី TikTok យើងនឹងហាមឃាត់វាពីសហរដ្ឋអាមេរិក” ។ លោក Trump បាននិយាយថា គាត់អាចប្រើអំណាចសេដ្ឋកិច្ចបន្ទាន់ (emergency economic power) ឬបទបញ្ជាប្រតិបត្តិ (executive order)។ វាមិនច្បាស់ភ្លាមៗ ថាតើការបញ្ជាបែបនេះនឹងមានលក្ខណៈបែបណា និងបញ្ហាប្រឈមផ្នែកច្បាប់យ៉ាងដូចម្តេចនោះឡើយ”។
យោងតាមប្រភពដែលស្និទ្ធនឹងបញ្ហានេះបានអោយរំពឹងថា លោកប្រធានាធិបតី Trump នឹងធ្វើការចុះហត្ថលេខាបង្ខំឱ្យក្រុមហ៊ុន ByteDance (ដែលជាម្ចាស់ប្រព័ន្ធផ្សព្វផ្សាយសង្គម TikTok) ធ្វើការលក់ ប្រតិបត្តិការរបស់ក្រុមហ៊ុន TikTok នៅសហរដ្ឋអាមេរិក។ ការធ្វើបែបនេះ នឹងដោះស្រាយការព្រួយបារម្ភរបស់អ្នកធ្វើគោលនយោបាយ ដែលយល់ថា ការគ្រប់គ្រងដោយជនបរទេសទៅលើ TikTok អាចជា ហានិភ័យសន្តិសុខជាតិ។
រដ្ឋមន្រ្តីក្រសួងហិរញ្ញវត្ថុលោក Steven Mnuchin បានប្រាប់អ្នកយកព័ត៌មាននៅសប្តាហ៍នេះថារដ្ឋាភិបាលសហរដ្ឋអាមេរិកកំពុងធ្វើការត្រួតពិនិត្យសន្តិសុខជាតិរបស់ TikTok ហើយកំពុងរៀបចំផ្តល់អនុសាសន៍គោលនយោបាយដល់លោក Trump ។
ByteDance បាននិងកំពុងពិចារណាលើការផ្លាស់ប្តូររចនាសម្ព័ន្ធសាជីវកម្មរបស់ខ្លួន ហើយតាមសេចក្តីរាយការណ៍កំពុងតែពិនិត្យមើលរួចហើយអំពីលទ្ធភាពនៃការលក់ភាគហ៊ុនភាគច្រើននៅក្នុង TikTok ។
យោងតាមសារព័ត៌មានញូវយ៉កថែមស៍ បានដកស្រង់សំដីមនុស្សដែលបានដឹងអំពីកិច្ចពិភាក្សាថា ក្រុមហ៊ុន Microsoft កំពុងពិភាក្សាដើម្បីទទួលទិញយក TikTok ។ ក្រុមហ៊ុន Microsoft បានបដិសេធមិនធ្វើអត្ថាធិប្បាយជាមួយសារព័ត៌មាន CNN Business។
កម្មវិធី TikTok នេះបានរីករាលដាលប្រកបដោយប្រជាប្រិយភាពនៅសហរដ្ឋអាមេរិក និងបណ្តាប្រទេសលោកខាងលិច ដែលបានក្លាយជាវេទិកាប្រព័ន្ធផ្សព្វផ្សាយសង្គមចិនដំបូងគេ ដែលទទួលបានការចាប់អារម្មណ៍យ៉ាងខ្លាំងពីអ្នកប្រើប្រាស់នៅក្រៅប្រទេស។
យោងតាមក្រុមហ៊ុនវិភាគ Sensor Tower បានឱ្យដឹងថាវាត្រូវបានគេទាញយក ៣១៥ លានដងក្នុងរយៈពេល ៣ ខែដំបូងនៃឆ្នាំនេះ ដែលការទាញយកប្រចាំត្រីមាសច្រើនជាងកម្មវិធីដទៃទៀតនៅក្នុងប្រវត្តិសាស្ត្រ។
ក្រុមអ្នករិះគន់ TikTok បារម្ភថា ទិន្នន័យដែលប្រមូលបានពីអ្នកប្រើប្រាស់អាមេរិករបស់ខ្លួនអាចនឹងស្ថិតក្នុងកណ្តាប់ដៃរដ្ឋាភិបាលចិន ទោះបីជា TikTok បាននិយាយថាខ្លួនផ្ទុកទិន្នន័យរបស់ខ្លួននៅក្រៅប្រទេសចិន ហើយថាវានឹងទប់ទល់រាល់ការប៉ុនប៉ងណាមួយរបស់ទីក្រុងប៉េកាំងក្នុងការចាប់យកព័ត៌មាននេះ។
“ទិន្នន័យអ្នកប្រើ TikTok របស់អាមេរិកត្រូវបានរក្សាទុកនៅសហរដ្ឋអាមេរិក ដោយមានការត្រួតពិនិត្យយ៉ាងតឹងរឹងលើការអាក់េសសដោយបុគ្គលិក។ វិនិយោគិនធំបំផុតរបស់ TikTok មកពីសហរដ្ឋអាមេរិក។ យើងប្តេជ្ញាការពារភាពឯកជន និងសុវត្ថិភាពរបស់អ្នកប្រើប្រាស់របស់យើង។ អ្នកនាំពាក្យរបស់ TikTok លោកស្រី Hilary McQuaide បានប្រាប់ CNN Business កាលពីថ្ងៃសៅរ៍។
អ្នកជំនាញខាងសុវត្ថិភាពតាមអុីនធឺណិតបាននិយាយថា ហានិភ័យសក្តានុពលរបស់ TikTok ចំពោះសន្តិសុខជាតិ គឺភាគច្រើនគឺជាទ្រឹស្តី ដែលមិនមានភស្តុតាងណាមួយដែលបង្ហាញថាទិន្នន័យអ្នកប្រើប្រាស់របស់ TikTok ត្រូវបានលួចគ្រប់គ្រង (compromise) ដោយចារកម្មចិនឡើយ៕