តាមប្រភពព័ត៌មានពី BBC បានឱ្យដឹងថា ការវាយប្រហារតាមអុិនធឺណិតដ៏ធំមួយ ដែលបានវាយប្រហាេវបសាយច្រើនជាង ២០០០ នៅក្នុងប្រទេសហ្សកហ្ស៊ីកាលពីឆ្នាំ២០១៩ នេះត្រូវបានអនុវត្តន៍ដោយប្រទេសរុស្ស៊ី នេះបើយោងតាមការបញ្ជាក់របស់ប្រទេសហ្សកហ្ស៊ី អង់គ្លេស និងសហរដ្ឋអាមេរិក។
រដ្ឋាភិបាលអង់គ្លេសនិយាយថា GRU (ចារកម្មយោធារបស់ប្រទេសរុស្ស៊ី) គឺនៅពីក្រោយការប៉ុនប៉ងបំផ្លាញអធិបតេយ្យភាពរបស់ប្រទេសហ្សកហ្ស៊ី (attempt to undermine Georgia’s sovereignty)។ រដ្ឋមន្រ្តីក្រសួងការបរទេសលោក Dominic Raab ពិពណ៌នាថា វាមិនអាចទទួលយកបាននោះទេ។ ទីភ្នាក់ងារសារព័ត៌មាន RIA និយាយថា ក្រសួងការបរទេសរុស្ស៊ីបានបដិសេធការពាក់ព័ន្ធណាមួយក្នុងរឿងនេះ។
មជ្ឈមណ្ឌលសន្តិសុខតាមអុិនធឺណិតជាតិរបស់អង់គ្លេស (NCSC) បានរកឃើញថា GRU ស្ទើរតែប្រាកដថា (almost certainty) “នៅពីក្រោយការវាយប្រហារជាច្រើន” ដែលជះឥទ្ធិពលដល់ទំព័រវេបសាយនានារាប់បញ្ចូលទាំងវេបសាយរបស់ប្រធានាធិបតីរបស់ប្រទេសហ្សកហ្ស៊ី និងទូរទស្សន៍ជាតិរបស់ប្រទេសនេះថែមទៀត។ ការវាយប្រហារនេះ គឺជាឧទាហរណ៍សំខាន់ដំបូងបំផុតនៃការវាយប្រហារតាមអុិនធឺណិតរបស់ GRU ចាប់តាំងពីឆ្នាំ២០១៧ មក។
ការវាយប្រហារជាច្រើនតាមអុិនធឺណិត ដែលធ្វើដោយ GRU
- ខែធ្នូ ឆ្នាំ ២០១៥៖ ការវាយប្រហារមួយទៅលើផ្នែកនៃបណ្តាញអគ្គិសនីរបស់ប្រទេសអ៊ុយក្រែនបានធ្វើឱ្យមនុស្ស ២៣០.០០០ នាក់គ្មានអគ្គិសនីប្រើប្រាស់ក្នុងរយៈពេលពី ១ ទៅ ៦ ម៉ោង
- ខែធ្នូ ឆ្នាំ ២០១៦៖ មេរោគមួយដែលត្រូវបានរចនាឡើងជាពិសេសដើម្បីរំខានដល់បណ្តាញអគ្គិសនីនាំឱ្យមួយភាគប្រាំនៃរដ្ឋធានីអ៊ុយក្រែនបាត់បង់ថាមពលក្នុងរយៈពេលមួយម៉ោង
- ខែមិថុនា ឆ្នាំ ២០១៧៖ ការវាយប្រហារតាមអុិនធឺណិតដែលមានលក្ខណៈបំផ្លិចបំផ្លាញបានផ្តោតលើវិស័យហិរញ្ញវត្ថុ ថាមពល និងរដ្ឋាភិបាលរបស់ប្រទេសអ៊ុយក្រែន។ វាក៏ជះឥទ្ធិពលដល់អាជីវកម្មអឺរ៉ុប និងរុស្ស៊ីផ្សេងទៀតផងដែរ
- ខែតុលា ឆ្នាំ ២០១៧៖ អាកាសយានដ្ឋាន Kyiv metro និង Odessa ក៏ដូចជាធនាគារកណ្តាលរបស់ប្រទេសរុស្ស៊ី និងប្រព័ន្ធផ្សព្វផ្សាយរបស់រុស្ស៊ីចំនួន ២ ត្រូវបានបង្អាក់បន្ទាប់ពីមេរោគ ransomware បានធ្វើការអ៊ីនគ្រីបទៅលើ Hard Drives
ចក្រភពអង់គ្លេសនិយាយថា ប្រទេសរុស្ស៊ីបានស្វះស្វែងធ្វើឱ្យមានការខ្វែងគំនិត និងរំខានដល់ការរស់នៅរបស់ប្រជាជនហ្សកហ្ស៊ី។ លោក Raab មានប្រសាសន៍ថា “រដ្ឋាភិបាលរុស្ស៊ីមានជំរើសច្បាស់លាស់ គឺបន្តអាកប្បកិរិយាដ៏គឃ្លើននេះប្រឆាំងនឹងប្រទេសដទៃទៀត ឬក្លាយជាដៃគូដែលមានទំនួលខុសត្រូវដែលគោរពច្បាប់អន្តរជាតិ” ។
រដ្ឋមន្រ្តីក្រសួងការបរទេសអាមេរិកលោក Mike Pompeo ក៏បានថ្កោលទោសការវាយប្រហារនេះដោយនិយាយថា សហរដ្ឋអាមេរិកអំពាវនាវឱ្យរុស្ស៊ីបញ្ឈប់ឥរិយាបទនេះនៅក្នុងប្រទេសហ្សកហ្ស៊ី និងកន្លែងផ្សេងទៀត។ ក្នុងករណីជាច្រើន វេបសាយជាច្រើនត្រូវបានជំនួសដោយរូបភាពរបស់អតីតប្រធានាធិបតីលោក Mikheil Saakashvili និងចំណងជើងថា “ខ្ញុំនឹងវិលត្រឡប់មកវិញ” ។
នេះគឺជាចំនុចថ្មីចុងក្រោយនៃយុទ្ធនាការ ដែលកំពុងបន្តនៃការដាក់សម្ពាធរបស់ចក្រភពអង់គ្លេសប្រឆាំងនឹងការស៊ើបការណ៍សម្ងាត់របស់ប្រទេសរុស្ស៊ី ចាប់តាំងពីការពុលរបស់អតីតចារកម្មរុស្ស៊ីលោក Sergei Skripal នៅ Salisbury កាលពីពីរឆ្នាំមុននេះ។ គោលបំណងគឺដើម្បីព្យាយាម និងរារាំងសកម្មភាពរបស់រុស្ស៊ី ដោយលាតត្រដាងរឿងនេះ។ ទិដ្ឋភាពគួរឱ្យកត់សម្គាល់នៃការសន្មតនេះគឺថា វាទាក់ទងទៅនឹងព្រឹត្តិការណ៍ដែលបានកើតឡើងនាពេលថ្មីៗនេះគឺនៅក្នុងខែតុលាឆ្នាំ ២០១៩ ។ គោលដៅមួយក្នុងចំនោមគោលដៅជាច្រើនគឺប្រព័ន្ធផ្សព្វផ្សាយនៅក្នុងប្រទេសហ្សកហ្ស៊ី។
គោលដៅទៅលើប្រព័ន្ធផ្សព្វផ្សាយជាច្រើន ដែលធ្វើឡើងដោយ GRU គឺយើងត្រូវត្រលប់ទៅយ៉ាងហោចណាស់នៅឆ្នាំ២០១៥ និងការបិទទៅលើប៉ុស្តិ៍ទូរទស្សន៍បារាំង TV5Monde ។ វានាំឱ្យមានការព្រួយបារម្ភ អំពីអ្វីដែលពួកគេអាចធ្វើបានប្រឆាំងនឹងប្រព័ន្ធផ្សព្វផ្សាយនៅក្នុងប្រទេសផ្សេងទៀត។ នេះត្រូវបានគេមើលឃើញថា ជាផ្នែកមួយនៃយុទ្ធសាស្រ្តរបស់ប្រទេសរុស្ស៊ីនៃសង្គ្រាមកូនកាត់ (hybrid warfare ) ឬសកម្មភាពនៅក្នុងចន្លោះភាពខុសច្បាប់ និងត្រូវច្បាប់ (gray-zone) ដែលត្រូវបានរៀបចំឡើងដើម្បីធ្វើឱ្យប្រទេសអស្ថេរភាព។
ទោះបីជាយ៉ាងណាក៏ដោយ បញ្ហាសម្រាប់ចក្រភពអង់គ្លេសគឺថា រហូតមកដល់ពេលនេះមានសញ្ញាតិចតួចនៃ GRU ដែលត្រូវបានរារាំង។ ការសាកល្បងដ៏សំខាន់មួយនឹងកើតឡើងជាមួយនឹងការបោះឆ្នោតនៅសហរដ្ឋអាមេរិកនៅឆ្នាំនេះ ហើយថាតើវាប៉ុនប៉ងជ្រៀតជ្រែកក្នុងរឿងនោះដូចដែលវាត្រូវបានគេចោទប្រកាន់ថាបានធ្វើនៅឆ្នាំ 2016 ដែរឬទេ។
សាស្ត្រាចារ្យ Alan Woodward អ្នកជំនាញខាងសន្តិសុខតាមប្រព័ន្ធអុិនធឺណិតនៅសកលវិទ្យាល័យ Surrey University ចក្រភពអង់គ្លេសនិយាយនៅពេលនៃការវាយប្រហារនៅហ្សកហ្ស៊ីថា ទំហំនៃការវាយប្រហារនេះ គឺជាអ្វីដែលយើងមិនធ្លាប់បានឃើញពីមុនមកទេ។ ក្នុងអំឡុងពេលនៃការប៉ះទង្គិចគ្នារវាងរុស្ស៊ី – ហ្សកហ្ស៊ីឆ្នាំ ២០០៨ ប្រទេសហ្សកហ្ស៊ីបានចោទប្រកាន់ទីក្រុងម៉ូស្គូពីបទវាយប្រហារតាមអុិនធឺណិតប្រឆាំងនឹងរដ្ឋាភិបាលរបស់ខ្លួន ទោះបីរុស្ស៊ីបដិសេធរឿងនេះក៏ដោយ។
សង្រ្គាមបានផ្ទុះឡើងបន្ទាប់ពីប្រទេសហ្សកហ្ស៊ីបានព្យាយាមដណ្តើមយកភាគខាងត្បូង South Ossetia ដែលបានប្រយុទ្ធប្រឆាំងនឹងការបះបោរប្រឆាំងនឹងប្រទេសហ្សកហ្ស៊ីនៅទសវត្សឆ្នាំ ១៩៩០ ។ បន្ទាប់មកកងទ័ពរុស្ស៊ីបានចូលមកក្នុងប្រទេសនេះ ហើយដណ្តើមកាន់កាប់ទឹកដីជាច្រើននៅក្នុងប្រទេសហ្សកហ្ស៊ីខាងត្បូង South Ossetia និង Abkhazia ផងដែរ។
ជាមួយគ្នានេះដែរប្រទេសអូស្រ្តាលី សហរដ្ឋអាមេរិក ប្រទេសកាណាដា នូវែសេឡង់ ក៏បានចេញមកធ្វើការថ្កោលទោសប្រទេសរុស្សីផងដែរ៕
ទាញយកកម្មវិធីសម្រាប់ទូរស័ព្ទស្មាតហ្វូន (Apple ឬ Android) ឬក៏ចូលរួមទៅក្នុងបន្ទប់ផ្តល់ព័ត៌មាន Telegram Channel សម្រាប់ទទួលបានព័ត៌មានចុងក្រោយស្តីអំពីសន្តិសុខអុិនធឺណិតទាំងក្នុង និងក្រៅប្រទេស៖ https://t.me/infosecisac
Download our iOS App or Android App or subscribe to our Telegram channel for the latest updates on the Cybersecurity Breaking News in both locally and internationally: https://t.me/infosecisac