យោងតាមវេបសាយ The Guardian បានឱ្យដឹងថា សុសវែររបស់ក្រុម NSO Group អាចធ្វើការថតទុកការសន្ទនារបស់អ្នក ថតចំលងរាល់សារ និងថតអ្នកដោយសំងាត់ទៀតផង។
Pegasus គឺសុសវែរហេគឃីង (hacking software) ឬ spyware មួយប្រភេទដែលត្រូវបានគេអភិវឌ្ឍន៍ឡើងដើម្បីលក់ទៅឱ្យរដ្ឋាភិបាលនៅជុំវិញពិភពលោក ដោយក្រុមហ៊ុនអុីស្រាអែលមួយមានឈ្មោះថា NSO Group។ វាមានសមត្ថភាពក្នុងការឆ្លងចូលទៅក្នុងស្មាតហ្វូនរាប់លានគ្រឿង ដំណើរការទាំង iOS និង Android។ ជំនាន់ដំបូងបំផុតនៃកម្មវិធី Pegasus ត្រូវបានរកឃើញនៅក្នុងឆ្នាំ២០១៦ ឆ្លងចូលទៅក្នុងស្មាតហ្វូនតាមរយៈ ការវាយប្រហារក្នុងទម្រង់ spear-phishing ដែលមានការផ្ញើសារ ឬអុីម៉ែលដែលអ្នកមុខសញ្ញាធ្វើការចុចទៅលើតំណរភ្ជាប់ណាមួយ។
ក្នុងឆ្នាំ២០១៩ កន្លងទៅនេះ WhatsApp ក៏បានបញ្ចេញព័ត៌មានដែរ ក្រុម NSO បានបញ្ជូនមេរោគទៅកាន់ស្មាតហ្វូនច្រើនជាង 1400 គ្រឿង ដោយការវាយលុកទៅលើចំនុចងាយរងគ្រោះ zero-day។ ដោយគ្រាន់តែធ្វើការទូរស័ព្ទតាម WhatsApp ទៅកាន់ឧបករណ៍គោលដៅ មេរោគ Pagasus អាចតំឡើងនៅក្នុងទូរស័ព្ទនោះ ទោះបីជាមិនបានទទួលទូរស័ព្ទនោះក៏ដោយ។ ថ្មីៗនេះ ក្រុម NSO នេះដដែលបានចាប់ផ្តើមវាយលុកទៅលើភាពងាយរងគ្រោះនៅលើ Apple’s iMessage ដែលអាចមានលទ្ធភាពក្នុងការ អាក់សេសចូលទៅក្នុងស្មាតហ្វូន iPhones រាប់រយលានគ្រឿងផងដែរ។
នៅពេលដែលតំឡើងរួចរាល់នៅក្នុងស្មាតហ្វូន សុសវែរ Pegasus អាចធ្វើការប្រមូលព័ត៌មានជាច្រើន ឬទាញយកឯកសារណាមួយក៏បាន។ ព័ត៌មាន ដែលមានដូចជា SMS, Address Books, Call History, Calendars, Emails និង Internet browsing histories គឺសុទ្ធសឹងតែអាចទាញយកបានទាំងអស់។
បញ្ហាប្រឈមដ៏ចំបងមួយដែលពាក់ព័ន្ធទៅនឹងកម្មវិធី Pegasus នេះគឺវាវាយលុកទៅលើចំនុចងាយរងគ្រោះដែលមិនត្រូវបានគេដឹង ឬហៅថា Zero-Day Vulnerability ដែលមានន័យថា ទោះបីជាស្មាតហ្វូនដ៏មានសុវត្ថិភាពមួយ ក៏មិនអាចរារាំងការវាយលុកនេះបានដែរ៕
