ប្រធានាធិបតីឥណ្ឌូនេស៊ី លោក ចូកូ វីដូដូ បានបញ្ជាកាលពីថ្ងៃសុក្រ ដើម្បីធ្វើសវនកម្មលើមជ្ឈមណ្ឌលទិន្នន័យរបស់រដ្ឋាភិបាល បន្ទាប់ពីមន្ត្រីបាននិយាយថា ទិន្នន័យភាគច្រើនដែលរងផលប៉ះពាល់ដោយការវាយប្រហារតាមអុីនធឺណិត ដោយមេរោគចាប់ជំរិត (ransomware) នាពេលថ្មីៗនេះ មិនត្រូវបានថតចំលងបម្រុងទុកទេ (back-up) ដែលនេះបង្ហាញពីភាពងាយរងគ្រោះរបស់ប្រទេសចំពោះការវាយប្រហារបែបនេះ។
ការវាយប្រហារតាមអុីនធឺណិតកាលពីសប្តាហ៍មុន ដែលអាក្រក់បំផុតនៅក្នុងប្រទេសឥណ្ឌូនេស៊ីក្នុងប៉ុន្មានឆ្នាំថ្មីៗនេះ បានរំខានដល់សេវាអនឡាញជាច្រើនរបស់រដ្ឋាភិបាល រួមទាំងសេវាអន្តោប្រវេសន៍ និងប្រតិបត្តិការនៅអាកាសយានដ្ឋានធំៗ។
រដ្ឋាភិបាលបាននិយាយថាអង្គភាពសាធារណៈច្រើនជាង ២៣០ អង្គភាព រួមទាំងក្រសួងបានរងផលប៉ះពាល់ ប៉ុន្តែបានបដិសេធមិនបង់ប្រាក់លោះចំនួន ៨លានដុល្លារ ដែលត្រូវបានទាមទារដោយឧក្រិដ្ឋជនសាយប័រ ដើម្បីទាញយកទិន្នន័យដែលត្រូវបានធ្វើកូដនីយកម្មត្រលប់មកវិញ។
ឆ្លើយតបទៅនឹងការវាយប្រហារតាមអុីនធឺណិតនេះ សវនកររដ្ឋរបស់ប្រទេសឥណ្ឌូនេស៊ីបាននិយាយថា ប្រធានាធិបតីបានណែនាំខ្លួនឱ្យធ្វើសវនកម្មឱ្យបានម៉ត់ចត់ទៅមើលមជ្ឈមណ្ឌលទិន្នន័យរបស់ប្រទេស។
លោក Hinsa Siburian ដែលជាប្រធានទីភ្នាក់ងារសន្តិសុខអុីនធឺណិតរបស់ប្រទេសឥណ្ឌូនេស៊ី (BSSN) បាននិយាយថា 98% នៃទិន្នន័យរបស់រដ្ឋាភិបាលដែលរក្សាទុកនៅក្នុងមជ្ឈមណ្ឌលទិន្នន័យមួយ ក្នុងចំណោមមជ្ឈមណ្ឌលទិន្នន័យពីរដែលរងគ្រោះនោះ មិនបានធ្វើការថតចំលងបម្រុងទុកឡើយ។ លោកបានប្រាប់ដល់សភាកាលពីល្ងាចថ្ងៃព្រហស្បតិ៍ថា “ជាទូទៅយើងឃើញបញ្ហាចម្បងគឺអភិបាលកិច្ច ហើយមិនមានការបម្រុងទុកទេ” ហើយដែលសមាជិកសភាមួយចំនួនច្រានចោលការពន្យល់នេះ។
ឯកឧត្តម Budi Arie Setiadi រដ្ឋមន្ត្រីក្រសួងទំនាក់ទំនងរបស់ឥណ្ឌូនេស៊ីបាននិយាយថា ក្រសួងមានសមត្ថភាពថតចំលងបម្រុងទុកនៅមជ្ឈមណ្ឌលទិន្នន័យ ប៉ុន្តែវាជាជម្រើសសម្រាប់ស្ថាប័នរដ្ឋាភិបាលក្នុងការប្រើសេវាកម្មនេះ។ លោកបាននិយាយថា ស្ថាប័នរដ្ឋាភិបាលមិនបានបម្រុងទុកទិន្នន័យដោយសារតែការរឹតបន្តឹងថវិកា ដោយលោកបានបន្ថែមថា វានឹងត្រូវដាក់ជាកាតព្វកិច្ចក្នុងពេលឆាប់ៗ។
Cover Image: FreePik
