ម៉ាស៊ីនមេរបស់ ASUS ត្រូវបានហេគ ហើយបញ្ជូនមេរោគទៅឱ្យអតិថិជនប្រើប្រាស់កុំព្យូទ័រម៉ាករបស់ខ្លួន
ក្រុមហ៊ុនបច្ចេកវិទ្យាយក្ស ASUS ដែលមានមូលដ្ឋាននៅតៃវ៉ាន់ត្រូវបានគេជឿថា បានបញ្ជូនមេរោគ (malware) ដល់អតិថិជនរាប់រយពាន់នាក់តាមរយៈសូហ្វវ៉ែរអាប់ដេត (software update) ដោយស្វ័យប្រវត្តិរបស់ខ្លួន បន្ទាប់ពីអ្នកវាយប្រហារបានគ្រប់គ្រងម៉ាស៊ីនមេរបស់ក្រុមហ៊ុន ហើយប្រើវាដើម្បីរុញច្រានមេរោគទៅម៉ាស៊ីននានា។
ក្រុមអ្នកស្រាវជ្រាវនៅក្រុមហ៊ុន Kaspersky Lab បានឱ្យដឹងថា ASUS ដែលជាក្រុមហ៊ុនផលិតកុំព្យូទ័រធំជាងគេនៅលើពិភពលោកត្រូវបានគេប្រើប្រាស់ដើម្បីតំឡើង Backdoor ទៅលើម៉ាស៊ីនកំព្យូទ័ររបស់អតិថិជនខ្លួនរាប់រយពាន់នាក់កាលពីឆ្នាំមុន បន្ទាប់ពីអ្នកវាយប្រហារបានធ្វើការគ្រប់គ្រងទៅលើម៉ាស៊ីនមេសម្រាប់បំរើឱ្យការងារអាប់ដេត។ Kaspersky Lab បាននិយាយថា មេរោគនោះត្រូវបានចុះហត្ថលេខាជាមួយវិញ្ញាបនប័ត្រឌីជីថល ASUS ស្របច្បាប់ដើម្បីធ្វើឱ្យវាក្លាយទៅជាការធ្វើបច្ចុប្បន្នភាពកម្មវិធីពីក្រុមហ៊ុន។
ក្រុមហ៊ុន ASUS ដែលមានមូលដ្ឋាននៅតៃវ៉ាន់ដែលផលិតកុំព្យូទ័រលើតុ កុំព្យូទ័រយួរដៃ ទូរស័ព្ទចល័ត ប្រព័ន្ធលំនៅដ្ឋានឆ្លាតវៃ និងផលិតផលអេឡិចត្រូនិចដទៃទៀត បានបញ្ជូនមេរោគទៅឱ្យអតិថិជនរបស់ខ្លួនយ៉ាងហោចណាស់ ៥ខែកាលពីឆ្នាំមុន មុនពេលត្រូវបានរកឃើញ – យោងទៅនឹងការស្រាវជ្រាវថ្មីមួយពីក្រុមហ៊ុនសន្តិសុខដែលមានមូលដ្ឋាននៅទីក្រុងម៉ូស្គូ។
ក្រុមអ្នកស្រាវជ្រាវបានប៉ាន់ប្រមាណថា ម៉ាស៊ីនវីនដូកន្លះលានគ្រឿងបានទទួលនូវ Backdoor ដែលមានគ្រោះថ្នាក់ តាមរយៈម៉ាស៊ីនមេអាប់ដេតរបស់ ASUS ទោះបីជាអ្នកវាយប្រហារហាក់ដូចជាសំដៅទៅលើតែប្រព័ន្ធប្រហែល 600 គ្រឿងប៉ុណ្ណោះ។ មេរោគបានស្វែងរកគោលដៅរបស់ខ្លួន តាមរយៈអាសយដ្ឋាន MAC ជាក់លាក់។ ប្រសិនបើវារកឃើញអាសយដ្ឋាន MAC ដែលជាគោលដៅ មេរោគនឹងទាក់ទងទៅកាន់ម៉ាស៊ីនមេរបស់អ្នកវាយប្រហារ ដើម្បីតំឡើងនូវមេរោគបន្ថែមទៀតនៅលើម៉ាស៊ីនទាំងនោះ។
Kaspersky Lab បាននិយាយថា ខ្លួនបានរកឃើញការវាយប្រហារនៅខែមករា បន្ទាប់ពីខ្លួនបានបន្ថែមបច្ចេកវិទ្យា supply-chain detection technology ទៅក្នុងកម្មវិធីស្កេនរបស់ខ្លួនដើម្បីចាប់យកបំណែកកូដដែលមិនប្រក្រតីលាក់នៅក្នុងកូដស្របច្បាប់ ឬកូដដែល hijack ទៅលើប្រតិបត្តិការធម្មតារបស់ម៉ាស៊ីន។ ក្រុមហ៊ុនមានគម្រោងចេញផ្សាយនូវបច្ចេកទេសលំអិត និងបទបង្ហាញអំពីការវាយប្រហារនេះ ដែលខ្លួនបានដាក់ឈ្មោះ ShadowHammer នៅខែក្រោយនៅឯសន្និសិទ្ធិកំពូលអ្នកវិភាគសន្តិសុខនៅសិង្ហបុរី។ ក្នុងខណៈនេះ Kaspersky បានបោះពុម្ពផ្សាយនូវព័ត៌មាននៃបច្ចេកទេសមួយចំនួននៅលើវេបសាយរបស់ខ្លួន។
ការវាយប្រហារនេះបានកើតឡើងនៅចន្លោះខែមិថុនា និងខែវិច្ឆិកាឆ្នាំ 2018 ហើយបានប៉ះពាល់ដល់អតិថិជន ASUS ដែលបានដាក់ឲ្យដំណើរការមុខងារ ASUS Live Update នៅលើប្រព័ន្ធរបស់ខ្លួន។ មុខងារមួយនេះត្រូវបានតំឡើងរួចជាស្រេចនៅលើម៉ាស៊ីន ASUS ភាគច្រើន ហើយត្រូវបានប្រើប្រាស់ដើម្បីធ្វើការអាប់ដេតដោយស្វ័យប្រវត្តិនូវ applications, software drivers, firmware និងកម្មវិធីតូចៗផ្សេងទៀត។
បញ្ហាប្រឈមនៃការវាយប្រហារក្នុងទម្រង់ Supply Chain Attack
យោងតាមលោក Costin Raiu ដែលជានាយកនៃ Kaspersky Lab’s Global Research and Analysis Team បានឲ្យដឹងថា ការរកឃើញនូវការវាយប្រហារ supply-chain attack គឺពិតជាលំបាកខ្លាំងណាស់ ហើយវាអាចជាបញ្ហាដ៏ធំបំផុតមួយនៅក្នុងផ្នែកសន្តិសុខព័ត៌មានៅពេលនេះ។ Kaspersky កំពុងធ្វើការលើបច្ចេកវិទ្យាថ្មីៗ ដើម្បីពិនិត្យមើលការវាយប្រហារបែបនេះ ដោយផ្អែកទៅលើកំហុសឆ្គងកូដ (code anomalies), ភាពស្រដៀងនឹងលេខកូដ (code similarity), និងការត្រួតពិនិត្យចរាចរណ៍ (traffic checking)។ គាត់បាននិយាយថា “បច្ចេកវិទ្យាមួយក្នុងចំណោមបច្ចេកវិទ្យាទាំងនេះ បានអនុញ្ញាតឱ្យយើងចាប់អ្នកវាយប្រហារ ShadowHammer ក៏ដូចជាការវាយប្រហារជាច្រើនដែលយើងសង្ស័យថាពាក់ព័ន្ធ។
យោងតាម Kaspersky Lab ការស៊ើបអង្កេតរបស់ខ្លួនបានបង្ហាញថាក្រុមដែលនៅពីក្រោយការវាយប្រហារលើប្រព័ន្ធ ASUS គឺក្រុម Barium ដែលជាអ្នកគំរាមកំហែងមួយ ដែលក្រុមហ៊ុន Microsoft ថ្មីៗនេះបានកំណត់ថា ជាអ្នកទទួលខុសត្រូវក្នុងការដាក់មេរោគ ShadowPad នៅក្នុងកម្មវិធីរបស់ NetSarang ។ ក្រុមនេះត្រូវបានគេជឿជាក់ថា នៅពីក្រោយការវាយប្រហារជាច្រើនទៅលើអ្នកបង្កើតកម្មវិធីហ្គេម (gaming applications) នេះបើតាមសម្តីរបស់ Kaspersky Lab ដែលចង្អុលទៅកាន់របាយការណ៍របស់ ESET ។
ទិដ្ឋភាពមួយនៃការវាយប្រហាររបស់ក្រុម ShadowHammer ដែលនៅតែមិនច្បាស់គឺថា តើអ្នកវាយប្រហារបានទទួលអាសយដ្ឋាន MAC នៃជនរងគ្រោះដែលមានបំណងតាមរបៀបណា។ លោក Raiu កត់សម្គាល់ថា ទោះបីជាយើងមិនដឹងច្បាស់ក៏ដោយ ក៏យើងជឿថាវាអាចទទួលបានតាមរយៈការវាយប្រហារខ្សែចង្វាក់ផ្គត់ផ្គង់មុនៗ ដូចជា ShadowPad និង CCleaner ជាដើម។
លោក Tom Hegel អ្នកស្រាវជ្រាវសន្តិសុខនៅក្រុមហ៊ុន Alien Labs របស់ក្រុមហ៊ុន AT & T Cybersecurity បាននិយាយថា “ក្រុម Barium បានបង្កការគំរាមកំហែងយ៉ាងខ្លាំងដល់សហគ្រាស” ។ លោកបានកត់សម្គាល់ថាក្រុមនេះត្រូវបានផ្សារភ្ជាប់ជាមួយនឹងក្រុម “Winnti” ដែលជាក្រុមឆ័ត្រធំមួយ ដែលធ្លាប់បានវាយប្រហារទៅលើអង្គភាពធំៗជាច្រើន។
លោកបាននិយាយថាវិធីសាស្ត្រធម្មតារបស់ក្រុម Barium គឺដើម្បីវាយប្រហារអង្គភាពនានា ដែលមានអ្នកប្រើប្រាស់ក្នុងដៃជាច្រើន ហើយបន្ទាប់មកប្រើអង្គភាពទាំងនោះដើម្បីសម្រេចគោលដៅដែលត្រូវបានកំណត់ទុកទៅនឹងផលប្រយោជន៍រយៈពេលវែងរបស់ពួកគេ។ ជាធម្មតា ការវាយប្រហារនេះពាក់ព័ន្ធនឹងការប្រើប្រាស់មេរោគ ដែលមានចុះហត្ថលេខាជាមួយនឹងវិញ្ញាបនបត្រហត្ថលេខា (code signing certificate)។ លោក Hegel បាននិយាយថា “សត្រូវមួយនេះ អាចធ្វើការវាយប្រហារទ្រង់ទ្រាយធំ ដើម្បីវាយប្រហារទៅលើបុគ្គលតូចៗពីរបីនាក់ ដែលផ្តល់បរិបទស្មុគស្មាញ និងសមត្ថភាពដ៏រឹងមាំរបស់ពួកគេដើម្បីបន្តបេសកកម្ម” ៕
ដំណោះស្រាយ
ក្រុមហ៊ុន Kaspersky បានជូនដំណឹងទៅដល់ក្រុមហ៊ុន ASUS ហើយនឹងបណ្តាក្រុមហ៊ុន Antivirus ផ្សេងៗទៀតអំពីការវាយប្រហារនេះ ក្នុងខណៈពេលដែលការស៊ើបអង្កេតនៅតែធ្វើបន្តទៀត។
ក្រុមហ៊ុនក៏បានបញេ្ចញនូវកម្មវិធីតូចមួយ (automated tool) សម្រាប់ឲ្យអ្នកប្រើប្រាស់ធ្វើការត្រួតពិនិត្យថាតើម៉ាស៊ីនម៉ាក ASUS របស់ខ្លួនទទួលរងគ្រោះដោយបញ្ហានេះឬក៏អត់៕
ប្រភព៖
