ក៏ដូចជាការបញ្ជូនពត៌មាននៅលើមជ្ឈដ្ឋានបញ្ជូនពត៌មានជាខ្សែអុបទិក រឺជា microwave link ដែរ ការវិភាគកញ្ចប់ថាមពល link budget មួយសំរាប់ប្រព័ន្ធបញ្ជូនតាមផ្កាយរណប satellite link មួយមានសារះសំខាន់ខ្លាំងណាស់ដើម្បីកំនត់បានជាក់លាក់ថាតើអានុភាពស៊ីញ៉ាល់ដែលទទួលបានគ្រប់គ្រាន់រឺទេនៅត្រង់ឧបករណ៍ទទួលនៃផ្កាយរណប (satellite) រឺ ស្ថានីយលើដី (earth station) ដើម្បីទទួលបានពត៌មានរឺទិន្នន័យដោយត្រឹមត្រូវ។
ការគណនា link power budget នឹងយកមកគិតដល់ផលចំនេញថាមពលនិងកំហាតបង់ថាមពលទាំងអស់ដោយគិតចាប់ពីឧករណ៍ផ្សាយកាត់តាមមជ្ឈដ្ឋានបញ្ជូនរហូតដល់ឧករណ៍ទទួលនៃប្រព័ន្ធបញ្ជូនពត៌មាននេះ។
ខាងក្រោមនេះគឺជាជំហ៊ានសង្ខេបក្នុងការគណនាកញ្ចប់ថាមពលនៃលីងរវាងស្ថានីយលើដីនិងផ្កាយរណប:
1- អានុភាពបញ្ចេញអ៊ីសូត្រូពិចសមមូល Equivalent Isotropically Radiated Power (EIRP): ត្រូវបានប្រើដើម្បីបង្ហាញអោយដឹងអានុភាពដែលផ្សាយចេញពីអង់តែនមួយ។ EIRP=អានុភាព Power + ផលចំនេញអនុភាពអង់តែន Antenna Gain។
2- គណនារាល់កំហាតបង់ថាមពលក្នុងការបញ្ជូន transmission losses ដោយរួមមានកំហាតបង់មិនប្រែប្រួល constant losses និងកំហាតបង់ដែលប្រែប្រួល variable losses ។ កំហាតបង់ក្នុងខ្សែ feeder losses គឺជាករណីមួយនៃ constant losses។ រឺឯបណ្តាកំហាតបង់ដែលទាក់ទងទៅនឹងលក្ខ័ណ្ឌបរិយាកាសនិងអាកាសធាតុហៅថា variable losses។ ជាសរុបកំហាតបង់ទាំងឡាយរួមមាន កំហាតបង់ក្នុងលំហសេរី free space loss, កំហាតបង់ feeder and branching loss (feeder, duplexers, filters…), កំហាតបង់ដោយសារការស្រូបយកថាមពលពីស៊ីញ៉ាល់នៅក្នុងស្រទាប់បរិយាកាសផែនដី atmospheric absorption loss (ស្រូបយកដោយម៉ូលេគុលអុកស៊ីសែន ចំហាយទឹក, កំហាតបង់ដោយសារទឹកភ្លៀង ពពកនិងអ័ព្រជាដើម), កំហាតបង់ដោយសារអង់តែនផ្សាយនិងទទួលតម្រង់រកគ្នាមិនបានល្អ antenna misalignment loss (depointing loss), កំហាតបង់ដោយសារការមិនស៊ីគ្នានៃប៉ូលកម្មរវាងអង់តែនផ្សាយនិងទទួល polarization losses (polarization misalignment loss)។
3- គណនាអានុភាពស៊ីញ៉ាល់ដែលទទួលនៅឯឧបករណ៍ទទួលដែលជាអនុគមន៍នៃ EIRP, ផលចំនេញអង់តែនទទួល receiving antenna gain, និងបណ្តាកំហាតបង់ថាមពលទាំងឡាយដែលរៀបរាប់ខាងលើ។
4- ស៊ីញ៉ាល់រំខានជាសីតុណ្ហភាពនៃប្រព័ន្ធ system noise temperature ដែលជាផលបូកនៃស៊ីញ៉ាល់រំខានជាសីតុណ្ហភាពនៃអង់តែន antenna noise temperature ព្រមទាំងសីតុណ្ហភាពរួមផ្សំនៃបណ្តាធាតុផ្សំដ៏ទៃផ្សេងទៀត។
5- គណនាថាមពលស៊ីញ៉ាល់រំខាននៃប្រព័ន្ធ system noise, ដង់ស៊ីតេស្បិចនៃស៊ីញ៉ាល់រំខាន noise spectral density (thermal noise) No។
6- គណនាថាមពលក្នុងមួយ bit ពត៌មាន energy per bit (Eb)។
7- គណនាតួលេខបញ្ជាក់គុណវឌ្ឍន៍ figure of merit ដើម្បីវាយតំលៃការបំពេញមុខងារនៃឧបករណ៍ទទួលដែលជាផលធៀបរវាងផលចំនេញអានុភាពនៃអង់តែន antenna gain និង សីតុណ្ហភាព system noise temperature (G/T)។
8- គណនាផលធៀបរវាងស៊ីញ៉ាល់ (រលកនាំ) និងស៊ីញ៉ាល់រំខានទទួលបាននៅឯផ្កាយរណប uplink signal to noise ratio (S/N រឺ C/N)។
9- គណនាផលធៀបរវាងស៊ីញ៉ាល់ (រលកនាំ) និងស៊ីញ៉ាល់រំខានទទួលបាននៅឯស្ថានីយលើដី downlink signal to noise ratio (S/N រឺ C/N)។
10- គណនាផលធៀបរវាងថាមពលស៊ីញ៉ាល់ក្នុងមួយ bit និងដង់ស៊ីតេនៃស៊ីញ៉ាល់រំខាន Bit Energy-to-Noise Density Ratio (Eb/No)។
11- គណនាកំរិតបំរុងថាមពល margin ដែលជាគំលាតរវាងអត្រា Eb/No ដែលបានគណនានិង Eb/No ដែលជាគោលដៅចង់បាន (អាស្រ័យលើប្រភេទ modulation scheme ដែលបានប្រើ គេអាចទទួលបានផលធៀប Eb/No ដែលត្រូវគ្នានឹងអត្រា BER ដែលចង់បានជាគោលដៅនោះ) ដើម្បីវាយតំលៃថាតើ link ដែលបានគណនានេះអាចប្រតិបត្តិបានដោយជោគជ័យ (តាមរយះការជ្រើសយកប៉ារ៉ាម៉ែត្រទាំងឡាយមកប្រើក្នុងការគណនា) ដែររឺទេ៕
ចូលរួមទៅក្នុងបន្ទប់ផ្តល់ព័ត៌មាន Telegram channel សម្រាប់ទទួលបានព័ត៌មានចុងក្រោយស្តីពីសន្តិសុខអុិនធឺណិតទាំងក្នុង និងក្រៅប្រទេស៖ https://t.me/infosecisac ។ ចង់ផ្សព្វផ្សាយពាណិជ្ជកម្ម សូមទំនាក់ទំនង info@secudemy.com.
Subscribe to our Telegram channel for the latest updates on the Cybersecurity Breaking News in both locally and internationally: https://t.me/infosecisac. For advertising: info@secudemy.com
ប្រភព៖ ទំព័រហ្វេសប៊ុក Telecommunications and Networking – បច្ចេកវិទ្យាទូរគមនាគមន៍ និង បណ្តាញ