ចាប់តាំងពីពាក់កណ្តាលសតវត្សរ៍ទី ១៧ មក ពិភពលោកបានឆ្លងកាត់ឧស្សាហូបនីយកម្មសំខាន់ៗបួនលើក ដោយសារការរកឃើញបច្ចេកវិទ្យាថ្មីៗ ដែលបង្កើតឲ្យមានបដិវត្តន៍ឧស្សាហកម្មចំនួន ៤ ជំនាន់។ បដិវត្តន៍ឧស្សាហកម្មជំនាន់ទី ១ បង្កើតឲ្យមានថាមពលទាញចេញពីចំហាយទឹក បដិវត្តន៍ឧស្សាហកម្មជំនាន់ទី ២ បង្កើតឲ្យមានថាមពលអគ្គិសនី និងបដិវត្តន៍ឧស្សាហកម្មជំនាន់ទី ៣ បង្កើតឲ្យមានបច្ចេកវិទ្យាទូរគមនាគមន៍និងឌីជីថល។ បច្ចុប្បន្ននេះ ប្រទេសមួយចំនួនបានឈានដល់បដិវត្តន៍ឧស្សាហកម្មជំនាន់ទី ៤ រួមមានប្រទេសជប៉ុន កូរ៉េខាងត្បូង អាល្លឺម៉ង់ ស្វីស ចិន និងសហរដ្ឋអាមេរិក។ តើអ្វីទៅជាបដិវត្តន៍ឧស្សាហកម្មជំនាន់ទី ៤ ឬឧស្សាហកម្មជំនាន់ទី៤? ហើយបើមិនចាប់យកឧស្សាហកម្មជំនាន់ទី ៤ នេះ តើស្ថានភាពសេដ្ឋកិច្ចប្រទេសកម្ពុជា នឹងប្រឈមបញ្ហាអ្វីខ្លះ?
កញ្ញា ផន បុប្ផា អ្នកសម្របសម្រួលកម្មវិធីឲ្យ VOA ប្រចាំរាជធានីភ្នំពេញ ពិភាក្សាជាមួយ លោក ភូ លីវុឌ្ឍ អ្នកស្រាវជ្រាវនិងអ្នកនិពន្ធមួយរូប នៅក្នុងសៀវភៅ Cambodia 2040 ឬ «កម្ពុជាឆ្នាំ ២០៤០» អំពីកិច្ចការដែលកម្ពុជាចាំបាច់ត្រូវធ្វើនិងមាន ដើម្បីសម្រេចបានឧស្សាហកម្មជំនាន់ទី ៤។
